Яңа сәхифәгә рәхим итегез!

Дөнья айлап-көнләп түгел, хәтта сәгатьләп үзгәрә. Азатлык дистә еллар буе радио дулкыннарына гына бәйле иде һәм әле дә радио дип атала. Әмма бу юлларны укыган кеше яхшы аңлый – медиа хәзер радио белән генә чикләнми, аның кырлары киңәя бара, һәм менә Азатлык та үзенең интернеттагы сәхифәсен яңартып, тыңлаучылары һәм укучылары белән аралашуны яңа дәрәҗәгә күтәрә.

Игътибар иткәнсездер, Азатлык сәхифәсе ике язманы да - латинны да, кирилны да куллана. Хакыйкать шул - татар-башкорт милләте һаман да үз язмасы мәсьәләсендә уртак карарга килә алмый. Моның үз сәяси сәбәпләре бар, әлбәттә. Әмма Азатлык радиосы моны хәл итә алмый. Ул арада читтәге татарлар латинда кала бирә, ә илдәге яшьләр аны белми үсә.

Безгә тыңлаучыларыбыз да, укучыларыбыз да бик кадерле, һәм без алар өчен латин имласында да, кирилда да язарга тырышабыз. Хәлдән килгәнчә, әлбәттә.

Азатлык бу мәсьәләдә гади бер принципка нигезләнә – замана татары белемле, мәгърифәтле, телләр белүче булырга... һәм төрле имлаларны, латинын да, кирилын да, кирәк икән, гарәп язмасын да танырга тиеш.

Бу сезнең дә сәхифә, кадерле дуслар. Аралашу мөмкинлекләре хәзер арта, үз Азатлыгыбызны үзебез булдырыйк. Азатлык белән заманадан калышмагыз!

Yaña säxifägä räxim itegez!

Dönya aylap-könläp tügel, xätta säğätläp üzgärä. Azatlıq distä yıllar buyı radio dulqınnarına ğına bäyle ide, äle radio dip atala. Ämma bu yullarnı uqığan keşe yaxşı añlıy – media xäzer radio belän genä çiklänmi, anıñ qırları kiñäyä bara, häm menä Azatlıq ta üzeneñ İnternettağı säxifäsen yañartıp, tıñlawçıları häm uquçıları belän aralaşunı yaña däräcägä kütärä.

İğtibar itkänsezder, Azatlıq säxifäse ike imlanı da - latinnı da, kirilni da - qullana. Xaqiqät şul - tatar-başqort milläte haman da üz yazması mäsäläsendä urtaq qararğa kilä almıy. Monıñ üz säyäsi säbäpläre bar, älbättä. Ämma Azatlıq radiosı monı xäl itä almıy. Ul arada çittäge tatarlar latinda qala birä, ä ildäge yäşlär anı belmi üsä.

Bezgä tıñlawçılarıbız da, uquçılarıbız da bik qäderle, häm bez alar öçen latin yazmasında da, kiril da yazarğa tırışabız. Xäldän kilgänçä, älbättä.

Azatlıq bu mäsälädä ğadi ber prinsipqa nigezlänä – zamana tatarı belemle, mäğrifätle, tellär belüçe bulırğa ... häm törle imlalarnı, latinın da, kirilın da, kiräk ikän, ğäräp yazmasın da tanırğa tieş.

Bu sezneñ dä säxifä, qäderle duslar. Aralaşu mömkinlekläre xäzer arta, üz Azatlığıbıznı üzebez buldırıyq. Azatlıq belän zamanadan qalışmağız!