Рөстәм Миңнеханов президентлыгына 100 көн

Тәхеткә Рөстәм Миңнехановның килүе белән белгечләр, сәяси даирәдә зур үзгәрешләр булуын юраса да, әлегә хакимиятне үзгәртеп кору эшләре әкрен бара.

Яңа президент өлешчә хөкүмәтне алмаштырды. Биредә 6 вице-премьер һәм яңа энергетика министрлыгы булдырылуы гына яңалык буларак кабул ителде.

Хөкүмәттән соң Рөстәм Миңнеханов район башлыкларына күчте. Соңгы берничә атнада гына президент 20%ка якын башлыкны алмаштырды. Әхмәтов сүзләренчә, район җитәкчеләрен алмаштырулар алга таба да дәвам итәчәк. “Чөнки Миңнеханов көз узачак муниципаль сайлауларга кадәр район хакимиятләренә ышанычлы кешеләрен билгеләргә тырыша”, ди белгеч.

Метшин хакимияттә калырмы?

Әхмәтов Казан хакимияте башлыгы Илсур Метшин турында да сүз кузгата. Аның сүзләренчә, Метшинның алдагы елларда Казан белән идарә итүе икеле. Миңнехановның Татарстанның 30% халкын туплаган Казанны Метшинга тапшырасы килми. Шуңа да дәүләт киңәшчесе Миңтимер Шәймиевкә якын, Дмитрий Медведевнең кадрлар резервына кергән Метшинның якын арада Ульян өлкәсе белән идарә итә башлавы турында да сүзләр йөри. Янәсе Ульян һәм Киров өлкәләре киләчәктә Татарстанга кушылырга мөмкин.

Исхаков исеме калыкты

Сәясәт белгече соңгы арада Казанның элекке башлыгы Камил Исхаковка игътибар артуын да әйтә. Казанда узган ислам бизнесы саммитында Миңнеханов та Камил Исхаковны кат-кат телгә алды. Шуңа күрә Әхмәтов, Исхаковның кире Казанга әйләнеп кайту мөмкинлеген фаразлый. “Бәлки ул Казанда урнашачак Русия ислам банкын җитәкләр, яисә Казан хакимиятенә башлык булып кайтыр”, ди Әхмәтов.

Шулай итеп, белгеч Казан хакимияте тәхете өчен көндәшлектә бер яктан Миңнеханов белән Исхаков, икенче яктан Метшин, Шәймиев һәм Мөхәммәтшин такымнарын каршы куя.

Мәскәү үзенекен кайгырта

“Мәскәү өчен иң мөһиме Русия президенты һәм Дәүләт думасы сайлаулары, шуңа да ил җитәкчелеге 2012 елга кадәр Татарстанны тулысынча буйсынучы республика буларак күрергә тели”, ди Әхмәтов. Шуңа да Миңнеханов 2012 елга кадәр Татарстанда хакимиятне тулысынча үз кулы астына алырга тиеш икән.

Әхмәтов фикеренчә, Татарстанда Владимир Путинга караган куәт көчләр, Дмитрий Медведевка караган либераллар, Рөстәм Миңнеханов һәм Миңтимер Шәймиев такымнары көч сынашачак. Һәркайсы Татарстанда хакимият белән 25%ка идарә итә. Республикада кайсы көчләрнең өстенрәк икәне муниципаль сайлаулардан соң беленәчәк. Шул ук вакытта Русия җитәкчелеге Миңнехановны да сынаячак. Әлегә Мәскәү Миңнеханов эшеннән тулысынча канәгать. Владимир Путинның күптән түгел Татарстанга сәфәреннән соң “Бу республикада мине барысы да канәгатьләндерде” дигән сүзләре моңа дәлил.