Татарлар ФСБ җитәкчесенә каршы күсәк уйнатуда катнашмаячак
22.02.2010
Башкорт яшьләре федераль иминлек хезмәте идарәсе башы Виктор Палагинны Башкортстаннан куу өчен узган атна ахырында ике пикет уздырды. Каршылык чаралары июнь аена кадәр дәвам итәчәк. Алдагысы 27 февральгә билгеләнгән.
Узган пикетларны Башкорт яшьләре иттифагы оештырса, монысын Башкортстан республикасының җәмәгатьчелек хокук яклау комитеты оештыра. Монысының статусы да зуррак - 27се митинг узачак. Аның төп шигаре - “Федераль үзәк һәм федерация субъектлары арасында федерализмны торгызу”.
Башкортстан җәмәгатьчелек хокук яклау комитетына Татар иҗтимагый үзәге дә керүе турында башкорт яшьләренең “Күк бүре” оешмасы сәхифәсе хәбәр иткән иде. Без җәмәгатьчелек хокук яклау оешмасы уздырган каршылык чарасында Татар иҗтимагый үзәгенең катнашу-катнашмавын белештек. Татар иҗтимагый үзәге рәисе Кадерле Имаметдинов:
“Ул комитетка Татар иҗтимагый үзәге кермәгән. Шулай булуга карамастан, анда ТИҮ әгъзалары бар. Без ул каршылык чарасында катнашмыйбыз. Үз вакытында без уздырган чараларга килеп, тавыш куптарып, комачаулап, өлкән яшьтәге кешеләргә кул күтәргән кешеләрне яклаячагыбыз юк”, дип белдерде.
Биредә шунысы гына аңлашылмый, Башкортстан җәмәгатьчелек хокук яклау оешмасына Татар иҗтимагый үзәге әгъзалары кергән бер вакытта, ТИҮ анда керми дип әйтү бик үк мантыйкка сыймый. Чөнки, ул оешманы төзүчеләр статусны күтәрү өчен төрле милли оешмаларны җәлеп итәргә тырышты, каршылык чарасында да башка милли оешмаларның булуына ирешергә телиләр.
Билгеле сәясәтче Альберт Мифтахов сүзләренчә: “Бу каршылык чаралары артында Башкортстан Президенты Мортаза Рәхимов тора. Ул Башкорт яшьләре иттифагын үз күзәтүендә тота һәм аны федераль үзәкне куркыту өчен файдалана. Ләкин 90нчы еллар узган инде, федераль үзәк мондый сепаратчыл адымнардан курыкмый. Виктор Палагинның да отставкасына ирешә алмаячаклар”.
Башкортстандагы рәсми оешмаларда һәм аерым кешеләрнең фатирларында үткән тентүләр республикага Русия хөкүмәте җитәкчесе Владимир Путин килеп киткәч башланган иде. Рәсми булмаган чыганаклар хәбәренә караганда, Владимир Путин Мортаза Рәхимовка үз теләге белән вазыйфасыннан китәргә тәкъдим иткән. Мортаза Рәхимов моны кабул итмәү сәбәпле, аның улы Урал Рәхимов экс-сенатор Игорь Изместьевның җинаять эше буенча Мәскәү мәхкәмәсенә чакырылган, икенчедән, федераль үзәккә каршы каршылык чаралары үткәрүдә даими катнашкан Башкорт яшьәләре иттифагы җитәкчеләренә карата басым башланган.
25нче февраль Башкортстан парламенты утырышы уза. Анда республика Президенты Мортаза Рәхимов елдагыча парламентка мөрәҗәгать белән чыгарга тиеш. Рәсми булмаган чыганаклар ул утырышта Мортаза Рәхимов вазыйфасыннан китәчәген белдерәчәк дип фаразлый. Дөрес, мондый фаразларның бу тәүгесе түгел. Бәлки соңгысы да түгелдер.