Казанда Илһам көннәре

Чит илләрдәге татарлар котлауларын төрлечә җиткерә: Үзбәкстан татарлары бүләк алып килгән, Финляндия татарлары котлавын видеотасмага яздырып җибәргән. Анда татарларның милли-мәдәни оешмасының җитәкчесе Дәнис Хафиз улы Бәдретдиннең мондый сүзләре бар: “Илһам абый, мин сезнең 1960 елларда Финляндиягә концерт белән килгәнегезне бик яхшы хәтерлим. Ул безнең фин татарлары өчен бик зур вакыйга булган иде. Сез юл салучы булдыгыз, беренчеләрдән идегез. Мин ул концертта татар моңын аңладым. Сез ул авыр елларда татар моңының нәрсә икәнен искә төшердегез”, ди ул.

Концертта Татарстанның халык шагыйре Роберт Миңнуллинның Илһам абыйга багышлап язылган шаярулы шигырен тамашачылар алкышларга күмде. Менә ул шигырьдән өзек:

Трактор, атлар чорыннан ук
Калган Илһам инде ул.
Кызыллар, аклар чорыннан
Калган Илһам инде ул.

Мактасаң ңа, кул чапсаң да
Урынлы Илһам бит ул.
Ханнар заманыннан калган
Борынгы Илһам бит ул.

Илһамнар кебек сәфәрдән
Ул әле яңа гына.
Хан заманнарыннан күчә
Миңнехан заманына.

Заманалар үзгәрсә дә,
Бетсә дә ил болганып,
Любой хан һәм любой патша
Тыңлар аны сокланып.

Илһам үзе – җыр-моң ханы
Бернигә дә карамый,
Ханнар белән тем более
Шаяртырга ярамый.

Концертның үзенчәлеге шунда: анда татарның танылган җырчылары, озак еллар бергә-бергә филармониядә эшләгән иҗатташ дуслары, шәкертләре Илһам Шакиров репертуарыннан иң популяр булган берәр җыр башкарды.

Идрис Газиев, Римма Ибраһимова, Венера Ганиева, Зилә Сөнгатуллина, Хәмдүнә Тимергалиева, Газинур Фарукшин, Салават Фәтхетдинов, Айдар Фәйзрахманов җитәкчелегендәге Татарстан фольклор музыка кораллары дәүләт ансамбле, “Зөләйлә” төркеме, Айгөл Сагынбаева, керәшен татарлары ансамбльләренең чыгышларын алып баручылар Илһам аганың тормышындагы вакыйгалар белән бәйләп алып барды.

“Китмә,сандугач!” җырын берьюлы өч җырчы – Георгий Ибушев, Рөстәм Маликов һәм Филүс Каһиров башкаргач, халык җырчыларны озак алкышларга күмде.

Ә инде Әлфия Авзалованы тамашачылар сәхнәдән кертеп җибәрмичә алкышлады. Сценарий буенча бер генә җыр җырларга кушылган Әлфия апага “җырлатмыйлар бит”. дип җилкә сикертүдән башкасы калмады.

Ахырда Илһам Шакиров репертуарындагы иң танылган һәм үзе татарлар яшәгән төрле төбәкләрдә йөргәндә табып, эшкәртеп халыкка җиткергән “Туган ил”, “Бик еракта идек без”, “Сарман” җырларын башкарды. Мәшһүр “Идел буе каеннары”н да җырлады.
Илһам Шакиров озак еллар эшләгән дәүләт филармониясендә үткән концертның сценариен Фәнис Җиһанша язган, режиссеры – Илдар Хәйруллин. Концертны Алсу Гайнуллина белән Әсхат Хисмәтов алып барды.

Татар дәүләт филармониясе 2010 елны И. Шакиров елы дип игълан итте. Бу концертны татарлар күпләп яшәгән төбәкләргә дә алып чыгарга ниятлиләр. Юбилей концертында татарның иң талантлы, иң танылган җырчылары катнашуы аны гади “солянка”дан аерып тора. Илһам Шакиров үзе гомере буе халык җырларын эзләп, эшкәртеп, югары сәнгать дәрәҗәсендә халкына кайтарып иҗат иткән җырчы. Бу концертта аның шушы җырларын белгән “илһамчы”лар тупланган иде.

Илһам Шакировның юбилеена багышланган икенче бер кичә М. Җәлил исемендәге Татар дәүләт опера һәм балет театрында югары җитәкчеләр каршында да узачак.