Путинның Уфага килүе файдага

Владимир Путинны Уфада узган елның октябрь ае азагында ук көткәннәр иде. Әмма, ни сәбәпледер, ул чакта аның сәфәре булмый калды. Бу юлы аның килүе рас дип әйтәләр. Владимир Путин Уфада төбәкләр үсеше мәсьәләләренә багышланган хөкүмәт киңәшмәсе үткәрәчәк дип хәбәр ителде. Киңәшмә 8 февральдә үтәчәк. Ә инде Путин әфәнде Уфага 7се кичен үк килергә дә мөмкин, дип фаразлана. Хөкүмәт рәисенең бу сәфәре кысаларында Уфадагы кайбер ширкәтләрдә, оешмаларда һәм Этнография музеенда булачагы мәгълүм. Һәрхәлдә, сәфәр кысаларындагы программада шулар каралган.

Монысы рәсми хәбәрләрдән алынган мәгълүматлар. Имеш-мимешләр дә бар. Аларга колак салсаң, Владимир Путин Башкортстан президенты белән очрашуда аның вазыйфасыннан китүе мәсьәләсен дә тикшерәчәк икән. Путин килгән, 7 февраль көне – Мортаза Рәхимовның туган көне. Аңа 76 яшь тула. Татарстан президенты Минтимер Шәймиевка 73 яшь тулгач, үз теләге белән президентлыктан китте. Башкортстан президенты тагын да өлкәнрәк, шуңа да аның да үз кәнәфиен калдыруы мөмкинлеге тикшерелүе бер караганда гаҗәп тә түгел.

Әмма бәйсез сәясәт белгечләре фикеренчә, Мортаза Рәхимов хакимияттән үз теләге белән китмәячәк. “Мәскәү кагылмаса, Рәхимов әфәнде үзенең әлеге президентлык мөддәтен тутырып, ягъни киләсе елның азагында гына китәчәк”, - дип белдерә республикадагы танылган галим, икътисад фәннәре докторы Ринат Гатауллин.

Ничек кенә булмасын Владимир Путинның Уфага килүе файдага гына. Зур кунакны каршылау алдыннан башкаланың торак-коммуналь хуҗалыгы хезмәткәрләре һәм эшчеләре көне-төне тәртип урнаштыра. Урамнар кар өемнәреннән, чүп-чардан тазартыла. Кем әйтмешли, үзәк урамнардагы кар көртләре, боз катламнары “ялап” алгандай булды. Хәзер инде халык сәфәр нәтиҗәләре ничек булыр дип уйлана. Мортаза Рәхимовның президентлыктан китүен теләүчеләр аеруча бу сәфәр йомгакларыннан яңалыклар көтә. Путин белән бергә Уфага РФ эчке эшләр министры Рәшит Нургалиев та килә.