Медведевның "фикер үзәге"ндә сәяси система алмашы турында хисап көтелә
02.02.2010
Чәршәмбе, 3 февральдә Русиянең Заманча тәрәккыять институтында «XXI гасыр Русиясе: Иртәгә теләнгән сүрәте” исемле хисап тәкъдим ителәчәк. Анда сүз эволюцион юл белән сәяси система алмашу турында бара диелә.
Чәршәмбе, 3 февральдә Русиянең Заманча тәрәккыять институтында «XXI гасыр Русиясе: иртәгә теләнгән сүрәте” исемле хисап тәкъдим ителәчәк.
Төрле имеш-мимешләргә сәбәп булган, әмма 3 февраль көндезге сәгать икегә кадәр киң җәмәгатьчелеккә чыгару катгый тыелган хисапның серлелеге, РБК хәбәр агентлыгы белдерүенчә, анда сүзнең эволюцион юл белән хакимият алмашы турында баруына бәйле.
Президентның “фикер үзәге” саналган институттагы либераль белгечләр әзерләгән хисап йөз битлек эссе рәвешендә язылган.
Аны җәмәгатьчелеккә интститут идарәсе рәисе Игорь Юргенс һәм Евгений Гонтмахер түгәрәк өстәл сөйләшүендә тәкъдим итәчәк, белгечләр Русиянең киләчәген заманчалаштыру турында фикер алышачак.
Игорь Юргенс Русияне заманчалаштыру эше инде күптәннән башланды һәм аны Русия президенты Дмитрий Медведев үзенең “Русия, алга!” програм мәкаләсендә, соңрак Федераль җыенга еллык юлламасында башлап җибәрде диде.
Институтның идарә әгъзасы Евгений Гонтмахер “Бу хисапның төп фикере - әгәр дә без хөрмәт ителгән һәм уңышлы Русияне күрергә телибез икән, аның аерым тармакларын гына заманчалаштырырга ярамый, бу мәсьәләгә тулаем карарга кирәк дигән фикер”, - диде.
“Без эволюцион юл белән заманчалаштырырга, сәяси системаның башка – демократик һәм көндәшлек итү сыйфатына китерәчәк яңарышка чакырабыз. Моның берничек тә “Әфлисун инкыйлабына” һәм 1991 елның августына охшамавы мөһим”, - ди Гонтмахер.