Грызлов илдә кемнең төп хуҗа булуын әйтә алмады

Дәүләт думасындагы 4 фирка – Бердәм Русия, Коммунистлар, Либерал Демократлар һәм Гадел Русиянең яшь депутатлары чәршәмбе партияләр җитәкчелеге белән очрашулар үткәрде.

Дума рәисе, Бердәм Русия вәкиле Борис Грызлов белән очрашуда төбәк башлыкларын турыдан-туры сайлау тәртибенә кире кайту мәсьәләсе күтәрелде.

Грызлов андый тәртипкә кире кайтырга әле иртә дип исәпләвен белдерде. "Хәзерге тәртип хәзерге вакыт өчен иң кулае”, - диде Грызлов.

Шул ук вакытта парламент рәисе төбәк башлыкларын сайлап кую да начар нәрсә түгел диде.

“Тик еш кына сайлап куелган кешеләрдән соңыннан ничек арынырга белмибез”, диде Грызлов.

Мисал итеп ул Амур өлкәсенең элекке губернаторы Леонид Коротковны китерде.

Өлкә халкы сайлап куйган Коротков Русия президентының ышанычын югалту сәбәпле 2007 елда вазифасыннан алынган иде.

Шунысы кызык, Коротков губернатор сайлавында Борис Грызловның туганнан-туганы, Рокоссовский исемендәге Ерак Көнчыгыш югары хәрби җитәкчелек мәктәбе башлыгы Владимир Грызловны җиңгән иде.
 
Дума рәисе, төбәк башлыкларын президентка төбәк парламентына сайлауда җиңгән фирка тәкъдим итә башлагач, бу механизмда демократия артты ди.

Очрашуда Гадел Русия фиркасе вәкиле парламент рәисеннән “Безнең илдә хәзер кем хуҗа – президентмы, премьермы?” - дип сорады.

Моның белән ул Грызловны бераз кыен хәлгә куйды. Берьяктан, конституция нигезендә президент хуҗа, икенче яктан, Грызлов Бердәм Русия җитәкчесе Владимир Путинны хуҗа түгел дип тә әйтә алмады.

Шуңа күрә ул “икесе дә” дигәнрәк җавап кайтарды. “Минемчә, хәзер бик уңай вәзгыять туды, президент белән хөкүмәт башлыгы бердәм булып эшли”, “башка дәүләтләргә дә шуны телим”, - диде Грызлов.

"Һәр өченче коммунист дини"

Коммунистлар фиркасе җитәкчесе Геннадий Зюганов үз фиркасендә дини кешеләрнең күп булуын белдерде.

Зюганов “Бездә һәр өченче кеше дингә ышана”, - диде.

Коммунистлар җитәкчесе үзе дә ел саен Хачтану көнендә бәкегә чума.

Зюганов моңарчы да җәмгыятьтә Рус православ чиркәвенең зур роль уйнавын, чиркәү белән коммунистларның максатлары уртак дип исәпләвен әйтеп килә иде.