Иран Көнбатышны сөнни гыйсъянчыларга ярдам итүдә гаепли
23.02.2010
Тәһран АКШның һәм Европа Берлегендәге кайбер илләрнең Иранда тоткарланган сөнни гыйсъянчылар җитәкчесе Габделмәлик Ригигың террор эшчәнлегенә ярдам иткәнлеген күрсәтүче “ышанычлы дәлилләр” бар дип белдерде.
Иранның иминлек министры Хәйдәр Мөслехи Пакстанда дип исәпләнелгән Ригиның махсус чара вакытында тоткарланганлыгын игълан итте.
Аның әйтүенчә, Җүндалла сөнни гыйсъянчылар төркеме башлыгы Риги кулга алыныр алдыннан 24 сәгать элек кенә АКШ хәрби ныгытмасында булган.
Ул шулай ук Ригиның кулга алынуга күп калмастан кайбер Европа илләрендә булганлыгын белдерде.
Ирандагы шыгый җитәкчелекне сөнниләргә каршы дискриминациядә гаепләүче әлеге төркем Иранда берничә бомба шартлату өчен җаваплылыкны үз өстенә алды.